હિન્દ ન્યુઝ, દાહોદ
દાહોદ ખાતે પ્રાંત અધિકારીશ્રી મિલિન્દ દવેના અધ્યક્ષસ્થાને તાલુકા સંકલન બેઠકનું આયોજન કરવામાં આવ્યું હતું. બેઠક દરમિયાન પોલિયો સ્ટીયરિંગ કમિટી, એલસીડીસી (LCDC) કાર્યક્રમ તેમજ સિકલ સેલ એનિમિયા કાર્યક્રમ અંગે વિસ્તૃત ચર્ચા અને સમીક્ષા કરવામાં આવી હતી.
આ બેઠકમાં આગામી તા. 28/06/2026 થી 30/06/2026 દરમિયાન દાહોદ તાલુકાના તમામ ગામોમાં પોલિયો રસીકરણ અંતર્ગત બુથ આધારિત તેમજ ઘર-ઘર મુલાકાત (હાઉસ-ટુ-હાઉસ) કામગીરી સુનિશ્ચિત રીતે પૂર્ણ કરવા અંગે, તા. 08/06/2026 થી 30/06/2026 સુધી 14 દિવસીય એલસીડીસી કાર્યક્રમની કામગીરી અંગે, સિકલ સેલ એનિમિયા કાર્યક્રમ અંતર્ગત દર્દીઓને ઉપલબ્ધ વિવિધ સહાય અને સરકારી યોજનાઓ અંગે, દર્દીઓને સમયસર સારવાર, અનુસરણ અને સહાયનો લાભ મળે તે માટે માર્ગદર્શન આપવામાં આવ્યું હતું.
આ ઉપરાંત તાલુકા પંચાયત હેઠળના વિવિધ વિભાગો દ્વારા અમલમાં મૂકવામાં આવતી વિકાસલક્ષી યોજનાઓ, જનકલ્યાણકારી કાર્યક્રમો, શિક્ષણ, મહિલા અને બાળ વિકાસ, વીજ પુરવઠો, સ્વચ્છતા, પોષણ, ગ્રામ વિકાસ તથા અન્ય વિભાગોની કામગીરીની પણ સમીક્ષા કરવામાં આવી હતી. વિવિધ વિભાગો વચ્ચે વધુ સારા સંકલન દ્વારા સરકારની યોજનાઓનો લાભ છેવાડાના નાગરિકો સુધી પહોંચે તે માટે જરૂરી સૂચનો અને માર્ગદર્શન આપવામાં આવ્યા હતા.
આ બેઠકમાં તાલુકા પ્રમુખશ્રી, દાહોદ, મામલતદાર, ચીફ ઓફિસર, તાલુકા વિકાસ અધિકારી, સીડીપીઓ (ઘટક-1, 2, 3 અને 4), દાહોદ લેપ્રસી મેડિકલ ઓફિસર, એમજીવીસીએલના કર્મચારીઓ તેમજ વિવિધ વિભાગોના અધિકારીઓ અને કર્મચારીઓ ઉપસ્થિત રહ્યા હતા.
