હિન્દ ન્યુઝ, ગાંધીનગર
હાલમાં ચાલી રહેલ મતદારયાદી ખાસ સઘન સુધારણા (SIR) કાર્યક્રમ અંતર્ગત, જિલ્લામાં મતદાર ગણતરી ફોર્મનું ૧૦૦ % ડિજિટાઇઝેશન સમયમર્યાદા પહેલાં પૂર્ણ કરનારા, ત્રણ BLO ને જિલ્લા ચૂંટણી અધિકારી અને કલેકટર મેહુલ કે. દવે તથા નાયબ જિલ્લા ચૂંટણી અધિકારી જય પટેલ દ્વારા પ્રમાણપત્ર આપી, ઉત્તમ કામગીરી બદલ સન્માનિત કરવામાં આવ્યા હતા.
૩૪-દહેગામ વિધાનસભા મતદાર વિભાગમાં સમાવિષ્ટ ભાગ નં.૨૩૭ – શિયાપુરાના BLO ધવલકુમાર બાબુભાઈ પટેલ, ૩૫-ગાંધીનગર (દક્ષિણ) વિધાનસભા મતદાર વિભાગમાં સમાવિષ્ટ ભાગ નં.૫૭, મગોડી-૫ (રતનપુર લાટ)ના BLO જીગ્નેશકુમાર ચીમનભાઈ પટેલ તથા ૩૭-માણસા વિધાનસભા મતદાર વિભાગમાં સમાવિષ્ટ ભાગ નં.૨૪ મોતીપુરા (વેડા) ના BLO શ્રીમતી કિંજલબેન પ્રજ્ઞેશકુમાર પટેલને જિલ્લા ચૂંટણી અધિકારી અને કલેકટર ગાંધીનગર તરફથી તેમની કામગીરી બદલ બિરદાવી ત્રણેય BLOને શ્રેષ્ઠતા પ્રમાણપત્ર એનાયત કરવામાં આવ્યું હતું.
આ સમયે કલેક્ટરએ BLO ઓની કામગીરીને બિરદાવતા જણાવ્યું હતું કે,”આપ સૌને સમય પૂર્વે કામગીરી પુર્ણ કરવા બદલ ખૂબ ખૂબ અભિનંદન.” આ સાથે જ તેમણે BLO પાસેથી ૧૦૦ ટકા કામગીરી, આયોજન બદ્ધ રીતે પૂર્ણ કરવા પાછળ, કરેલી મહેનત અને સ્ટ્રેટેજી અંગેની માહિતી મેળવી હતી તેમજ અન્ય BLOઓને પણ આયોજનબદ્ધ રીતે કાર્ય કરવા પ્રેરણા આપવા અનુરોધ કર્યો હતો.
