હિન્દ ન્યૂઝ, ભુજ
આજરોજ કલેકટર કચેરી ખાતે જિલ્લા ચૂંટણી અધિકારી અને કલેકટર દિલીપ રાણાના અધ્યક્ષસ્થાને મીડિયા સર્ટિફિકેશન એન્ડ મોનિટરીંગ કમિટી(MCMC)ની બેઠક યોજાઈ હતી. આ બેઠકમાં જિલ્લા ચૂંટણી અધિકારી અને MCMCના અધ્યક્ષ દિલીપ રાણાએ રાજકીય જાહેરખબરોનું પૂર્વ-પ્રમાણિકરણ, પેઈડ ન્યૂઝ, મીડિયા દ્વારા થતા આચારસંહિતાના ઉલ્લંઘનોનું મોનિટરીંગ, ઉમેદવારોની ચૂંટણી ખર્ચ વગેરે બાબતો વિશે ઉપસ્થિત સૌ સભ્યોને માર્ગદર્શન પુરું પાડીને જરૂરી સૂચનાઓ આપી હતી. ચૂંટણી પંચની માર્ગદર્શિકા પ્રમાણે ઉપરોક્ત કમિટી કામગીરીની તૈયારીઓ વિશે જિલ્લા ચૂંટણી અધિકારીએ વિગતો મેળવી હતી.
આ બેઠકમાં નિવાસી અધિક કલેકટર અને MCMC કમિટીના ઉપાધ્યક્ષ મિતેશ પંડ્યા, કમિટીના સભ્યો સર્વમાં પ્રાંત અધિકારી ભુજ અને ચૂંટણી અધિકારી ભુજ અતિરાગ ચપલોત, નિષ્પક્ષ પત્રકાર ચંદ્રવદન પટ્ટણી, નાયબ માહિતી નિયામક મિતેશ મોડાસીયા, સોશિયલ મીડિયા નિષ્ણાંત મહેશ મૂલાણી, આકાશવાણી પ્રોગ્રામ એક્ઝિક્યુટિવ ભરત ચતવાણી તેમજ નાયબ જિલ્લા ચૂંટણી અધિકારી બી.કે.પટેલ ઉપસ્થિત રહ્યા હતા.
