હિન્દ ન્યુઝ, આણંદ
આણંદ જિલ્લા વિકાસ અધિકારી મિલિન્દ બાપનાની બદલી આણંદ મહાનગરપાલિકાના પ્રથમ કમિશનર તરીકે થતા તેમની જગ્યાએ આણંદ જિલ્લા વિકાસ અધિકારી તરીકે વર્ષ ૨૦૨૦ ની બેચના આઈ.એ.એસ. અધિકારી સુ. દેવાહુતીની બદલીથી નિમણૂક થતાં તેમણે આણંદ જિલ્લા વિકાસ અધિકારી તરીકેનો પદભાર સંભાળ્યો છે.
જમ્મુ કાશ્મીરના વતની એવા સુ. દેવાહુતી બી.એ, એલ.એલ.બી. સુધીનો અભ્યાસ પૂર્ણ કર્યા બાદ સનદી સેવા માટેની પરીક્ષા પાસ કરી વર્ષ ૨૦૨૦ માં આઈ.એ.એસ. થયા. આઈ.એ.એસ. બન્યા બાદ તેમણે પ્રોબેશન સમયમાં ખેડા જિલ્લામાં અને ત્યારબાદ આસિસ્ટન્ટ કલેકટર, ગોંડલ અને રાજકોટ ગ્રામ્યમાં નિષ્ઠાપૂર્વક ફરજ બજાવી છે. આણંદ જિલ્લા વિકાસ અધિકારી તરીકેનો પદભાર સંભાળ્યા પહેલા તેઓ બનાસકાંઠા જિલ્લામાં પ્રાયોજના વહીવટદાર તરીકે ફરજ બજાવતા હતા.
સુ. દેવાહુતિએ એક મુલાકાતમાં જણાવ્યું હતુ કે, તેઓ તેમના પરિવારના પહેલા વ્યક્તિ છે જેમણે સનદી સેવા માટેની પરીક્ષા પાસ કરી છે. રાજયના વિવિધ જિલ્લાઓની તેમની ફરજ દરમિયાન ગુજરાતના લોકોના સહકારભર્યા સ્વભાવને બિરદાવી તેમણે આણંદ જિલ્લા વિકાસ અધિકારી તરીકેની તેમની પ્રાથમિકતા જણાવતા ઉમેર્યું હતુ કે, આણંદ જિલ્લો વિકાસશીલ જિલ્લો છે. આ જિલ્લાના વિકાસને આગળ વધારવાની મને જે તક મળી છે તેને હું નિષ્ઠાપૂર્વક અદા કરી આણંદ જિલ્લાના વિકાસને વેગ મળે તે માટે હંમેશા પ્રયત્નશિલ રહીશ.
