હિન્દ ન્યુઝ, ભુજ
દેશમાં બનતા ગુનાઓમાં સીરીયલ બોમ્બ બ્લાસ્ટ જેવા હુમલાઓમાં સાયકલ/મોપડે/બાઈકનો ઉપયોગ કરવામાં આવેલ હોવાનું તપાસમાં ધ્યાને આવેલ છે. આ પ્રકારના હુમલાઓમાં સાયકલ, સ્કૂટર, ટીફીન કે પાઇપનો ઉપયોગ થતો હોય છે. જેથી નવા જુના સાયકલ, સ્કૂટર, મોપેડ, બાઇક ખરીદી સમયે ખરીદનાર વ્યક્તિની ઓળખ માટે વેપારીઓએ કોઇ માન્યતા પ્રાપ્ત દસ્તાવેજી પુરાવા રાખવા માટે જિલ્લા મેજિસ્ટ્રેટ અમિત અરોરા દ્વારા ભારતીય નાગરિક સુરક્ષા સંહિતા-૨૦૨૩ની કલમ-૧૬૩ અન્વયે ફરમાવેલ છે કે, કચ્છ જિલ્લામાં મહેસૂલી હદમાં આવેલ તમામ જૂના/નવા સાયકલ/સ્કૂટર/મોપેડ/બાઈક લે-વેચ કરતાં વેપારીઓ જૂના નવા સાયકલ/સ્કુટર/મોપેડ/બાઈકના ખરીદ વેચાણ માટે નિયમોનું પાલન કરવાનું રહેશે.
હુકમ અનુસાર કચ્છ જિલ્લાની મહેસુલી હદમાં આવેલ તમામ જુના/નવા સાયકલ, સ્કૂટર, મોપેડ, બાઇક લે-વેચ કરતા વેપારીઓએ નવા જુના સાયકલ, સ્કૂટર, મોપેડ, બાઇક ખરીદી સમયે ખરીદનાર વ્યક્તિની ઓળખ માટે વેપારીઓએ કોઇ માન્યતા પ્રાપ્ત દસ્તાવેજી પુરાવા જેવા કે રેશનકાર્ડ, ચૂંટણી કાર્ડ વિગેરે મેળવી તેની ખરાઇ કરી સાયકલ, સ્કૂટર, મોપેડ, બાઇક વેચાણ સમયે બીલમાં સાયકલ, સ્કૂટર, મોપેડ, બાઇકનો પ્રકાર, ચેસીસ નંબર, ગ્રાહકનું નામ, સરનામું, ટેલીફોન નં. વિગેરે લખવાનું રહેશે.
ભારતીય નાગરિક સુરક્ષા સંહિતા-૨૦૨૩ની કલમ-૨૧૫ની આદેશાત્મક જોગવાઈઓ ધ્યાને લઈ આ જાહેરનામાનાં ભંગ બદલ ભારતીય ન્યાય સંહિતા-૨૦૨૩ની કલમ-૨૨૩ અન્વયે ગુના કામે આ જાહેરનામાં હેઠળ તપાસ કરવાનાં, જાહેરનામાનાં પાલન કરાવવાનાં અને તપાસનાં અંતે ફરીયાદ રજૂ કરવાનાં અધિકાર જિલ્લાનાં પોલીસ અધિકારીઓ તેમજ હેડ કોન્સ્ટેબલ કે તે ઉપરનાં કર્મચારીઓને રહેશે.
આ જાહેરનામું તા.૨૯/૦૧/૨૦૨૫ સુધી અમલમાં રહેશે. સમગ્ર જિલ્લામાં આ હુકમનો ભંગ કે ઉલ્લંઘન કરનાર ઈસમ ભારતીય ન્યાય સંહિતાની કલમ-૨૨૩ મુજબ શિક્ષાને પાત્ર થશે.
