હિન્દ ન્યુઝ, ગાંધીનગર
ગાંધીનગર જિલ્લામાં આગામી નગરપાલિકા, જિલ્લા પંચાયત અને તાલુકા પંચાયતોની સામાન્ય તથા મધ્યસત્ર ચૂંટણીઓને ધ્યાને રાખીને જિલ્લા મેજિસ્ટ્રેટ શ્રી રવિન્દ્ર ખતાલે (IAS) દ્વારા ભારતીય નાગરિક સુરક્ષા સંહિતા, ૨૦૨૩ ની કલમ-૧૬૩ હેઠળ એક મહત્વપૂર્ણ જાહેરનામું બહાર પાડવામાં આવ્યું છે. આ હુકમનો મુખ્ય હેતુ ચૂંટણી પ્રક્રિયાને મુક્ત, ન્યાયી અને શાંતિપૂર્ણ વાતાવરણમાં સંપન્ન કરાવવાનો છે.
મુખ્ય નિર્દેશો અને પ્રતિબંધો
– બલ્ક મેસેજ પર રોક: કોઈ પણ વ્યક્તિ કે સંસ્થા ઉશ્કેરણીજનક, જ્ઞાતિ-ધર્મ વચ્ચે વૈમનસ્ય ફેલાવે તેવા અથવા કાયદો અને વ્યવસ્થા જોખમાય તેવા મેસેજ (SMS, MMS) કે સોશિયલ મીડિયા પોસ્ટ કરી શકશે નહીં.
– રાજકીય સંદેશાઓ પર પ્રતિબંધ: મતદાન પૂર્ણ થવાના ૪૮ કલાક પહેલા, એટલે કે તા. ૨૪/૦૪/૨૦૨૬ સાંજના ૧૮:૦૦ કલાકથી તા. ૨૬/૦૪/૨૦૨૬ સાંજના ૧૮:૦૦ કલાક સુધી કોઈપણ પ્રકારના રાજકીય સંદેશાઓનું પ્રસારણ સંપૂર્ણપણે પ્રતિબંધિત રહેશે.
– ટેલીકોમ કંપનીઓને સૂચના: BSNL, Airtel, VI, Jio જેવી મોબાઈલ સર્વિસ પ્રોવાઈડર કંપનીઓ અને ફેસબુક, વોટ્સએપ, ટ્વિટર જેવી સોશિયલ સાઈટ્સને આદેશ આપવામાં આવ્યો છે કે તેઓ આદર્શ આચારસંહિતાનો ભંગ થાય તેવા બલ્ક મેસેજ કે પોસ્ટ્સ પ્રસારિત થવા દેશે નહીં.
– સમયગાળો: આ આદેશ સમગ્ર ચૂંટણી પ્રક્રિયા દરમિયાન એટલે કે તા. ૩૦/૦૪/૨૦૨૬ સુધી અમલમાં રહેશે.
કયા વિસ્તારોમાં લાગુ પડશે?
આ હુકમ ગાંધીનગર જિલ્લાના જે વિસ્તારોમાં ચૂંટણી યોજાનાર છે (કલોલ, દહેગામ નગરપાલિકા, જિલ્લા પંચાયત અને કલોલ, માણસા, દહેગામ તાલુકા પંચાયત હેઠળના વિસ્તારો) ત્યાં લાગુ પડશે.
આ હુકમનો ભંગ કરનાર ઈસમો સામે કાયદેસરની કાર્યવાહી કરવામાં આવશે. ઉપરાંત જિલ્લા વહીવટી તંત્ર દ્વારા તમામ નાગરિકોને અફવાઓથી દૂર રહેવા અને શાંતિ જાળવી રાખવા અપીલ કરવામાં આવી છે.
