હિન્દ ન્યુઝ, વડોદરા
કૌશલ્ય વર્ધન સાથે રમતગમતની ભાવના કેળવવાના હેતુથી ઔદ્યોગિક તાલીમ સંસ્થા, તરસાલી ખાતે તાજેતરમાં વાર્ષિક ‘સ્પોર્ટ્સ વીક’નું આયોજન કરવામાં આવ્યું હતું. તા. ૨૫/૦૨/૨૦૨૬ થી ૨૭/૦૨/૨૦૨૬ દરમિયાન યોજાયેલા આ રમતગમત મહોત્સવમાં સંસ્થામાં કાર્યરત ૪૦થી વધુ વિવિધ ટ્રેડના ૨૦૦૦થી વધુ તાલીમાર્થીઓએ ઉત્સાહભેર ભાગ લઈ પોતાની ખેલપ્રતિભાનું પ્રદર્શન કર્યું હતું. આ સ્પોર્ટ્સ વીક દરમિયાન વોલીબોલ, ખો-ખો, રસ્સાખેંચ, બેડમિન્ટન, ગોળા ફેંક, સ્લો સાયકલિંગ, સંગીત ખુરશી, ડોઝ બોલ અને કેરમ જેવી વિવિધ મેદાની તથા ઇન્ડોર રમતોનું આયોજન કરવામાં આવ્યું હતું.
આ રમતગમત સપ્તાહના સફળ સમાપન નિમિત્તે તા. ૦૨/૦૩/૨૦૨૬ના રોજ સંસ્થા ખાતે એક વિશેષ ઇનામ વિતરણ સમારોહ યોજાયો હતો. આ કાર્યક્રમમાં બેંક ઓફ બરોડાના સહયોગથી કોર્પોરેટ સોશિયલ રિસ્પોન્સિબિલિટી અંતર્ગત વિજેતા તાલીમાર્થીઓને મેડલ તથા ટ્રોફી એનાયત કરી પ્રોત્સાહિત કરવામાં આવ્યા હતા.
