હિન્દ ન્યુઝ, ગોધરા
મુખ્યમંત્રી ભૂપેન્દ્રભાઈ પટેલના વરદ્હસ્તે ગોધરા ખાતે પ.પૂ.ગોસ્વામી દ્વારકેશલાલજી મહારાજ તેમજ અન્ય મહાનુભાવોની ઉપસ્થિતિમાં ‘આરોગ્યમ્’ કેન્સર અને સુપર સ્પેશ્યાલિટી હોસ્પિટલનું ઉદ્દઘાટન કરવામાં આવ્યું હતું.
મુખ્યમંત્રીએ આ અવસરે જણાવ્યું હતું કે, માનનીય વડાપ્રધાન નરેન્દ્રભાઈ મોદીએ સંવેદનશીલતા અને દીર્ઘદ્રષ્ટિથી તમામ જરૂરિયાતમંદ પરિવારોને ગુણવત્તાસભર આરોગ્ય સુવિધાની ઉપલબ્ધિ સુનિશ્ચિત કરેલ છે. તેમણે સ્વચ્છતા અભિયાન, શુદ્ધ જળ, શૌચાલય જેવા સ્વાસ્થ્યવર્ધક અભિયાનથી લોકોના આરોગ્યમાં થયેલ સુધારાનો સંદર્ભ આપવાની સાથે જ રાજ્યના આદિવાસી બાહુલ્ય ધરાવતા વિસ્તારોમાં અત્યાધુનિક આરોગ્ય સુવિધાઓની રૂપરેખા આપી હતી તેમજ હોસ્પિટલના શુભારંભ બદલ અભિનંદન પાઠવ્યા હતા.
