હિન્દ ન્યુઝ, મહીસાગર
રાજ્ય સરકારની પ્રજાલક્ષી યોજનાઓનો લાભ પ્રજાને સતત મળતો રહે અને વહીવટમાં કાર્યક્ષમતા, પારદર્શકતા, સંવેદનશીલતા તથા જવાબદારીપણાની ભાવના વધુ સુદૃઢ બને તે માટે રાજ્ય સરકાર દ્વારા વ્યક્તિગત સેવાઓ લોકોને તેમના રહેઠાણના નજીકના સ્થળે તે જ દિવસે પ્રાપ્ત થઈ શકે તેવા ઉમદા હેતુ સાથે સેવા સેતુ કાર્યક્રમનો પ્રારંભ કરવામાં આવ્યો હતો. તા. ૧૭ સપ્ટેમ્બરથી મહીસાગર જિલ્લામાં સેવાસેતુ કાર્યક્રમના દસમા તબક્કાનો પ્રારંભ કરવામાં આવ્યો છે. જે અંતર્ગત આજ રોજ જિલ્લા પંચાયત પ્રમુખશ્રી બાબુભાઇ પટેલની પ્રેરક ઉપસ્થતિમાં કડાણા તાલુકાના કરવાઈ ગામ ખાતે સેવા સેતુ કાર્યક્રમ યોજાયો હતો.
આ પ્રસંગે જિલ્લા પંચાયત પ્રમુખ બાબુભાઇ પટેલે જણાવ્યું હતું કે, સેવા સેતુ કાર્યક્રમ થકી લાભાર્થીઓને વિવિધ વિભાગ હેઠળ ૫૫ જેટલી યોજનાઓનો લાભ આપવામાં આવશે. સેવા સેતુ દ્વારા સરકાર અરજદારોને દ્વારે પહોંચી છે. પારદર્શિતા સાથે સંવેદનશીલતાનો સમન્વય સેવા સેતુમાં જોવા મળી રહ્યો છે. અગાઉના તબક્કાઓમાં સેવા સેતુ દ્વારા લાખો લોકોને એક જ દિવસમાં સ્થળ પર તેમના પ્રશ્નોના નિવારણ મળ્યા છે ત્યારે આ દસમાં સેવા સેતુ દ્વારા પણ લોકોને તમામ સેવાઓનો લાભ ઝડપી મળે તે રાજ્ય સરકાર સુનિશ્ચિત કરી રહી છે.
આ પ્રસંગે કડાણા તાલુકા પંચાયત પ્રમુખ શ્રીમતી મંગુબેન, સંતરામપુર પ્રાંત અધિકારી, મમલતદાર સહિત ગ્રામજનો ઉપસ્થિત રહ્યા હતા.
રિપોર્ટર : જયેશ ડામોર, મહીસાગર
