હિન્દ ન્યુઝ, દીવ
નશીલા પદાર્થોનો દુરુપયોગ અને ગેરકાયદેસર હેરફેર સામેનો આંતરરાષ્ટ્રીય દિવસએ નશીલા પદાર્થોના દુરુપયોગ અને ગેરકાયદેસર હેરફેર સામે સંયુક્ત રાષ્ટ્રનો આંતરરાષ્ટ્રીય દિવસ છે. જે દર વર્ષે ૨૬ જૂનના રોજ સમગ્ર વિશ્વમાં ઉજવવામાં આવે છે. જેનો મુખ્ય ઉદ્દેશ્ય નશીલા પદાર્થોના દુરુપયોગ મુક્ત વિશ્વના ધ્યેયને હાંસલ કરવા માટેના સકારાત્મક પગલાં અને સહકારને મજબૂત કરવા માટેનો છે. “નશા મુક્ત ભારત” માટે ભારત સરકાર દ્વારા સમાજિક ન્યાય અને અધિકારિતા મંત્રાલય સામાજિક ન્યાય અને અધિકારિતા વિભાગ હેઠળ ૧૫ ઓગસ્ટ ૨૦૨૦ નાં રોજ “નશા મુક્ત ભારત અભિયાન” ની શરૂઆત કરવામાં આવેલ હતી. આ અભિયાનનો મુખ્ય ઉદ્દેશ્ય લોકોને વિવિધ પ્રકારના નશાથી મુક્ત કરવાનો અને લોકોમાં વિવિધ પ્રકારના નશા અને તેનાથી માનવ શરીર પર થતી ખરાબ અસર અને નુકશાન વિશે જાગૃતતા ફેલાવવાનો છે.
જે અનુસંધાનમાં દીવ જિલ્લા સમાહર્તા અને નશા મુક્ત ભારત અભિયાન દીવના અધ્યક્ષ શ્રીમતી ભાનુ પ્રભાના દિશાનિર્દેશ અને માર્ગદર્શન હેઠળ જિલ્લા બાળ સુરક્ષા એકમ, દીવ દ્રારા નશીલા પદાર્થોનો દુરુપયોગ અને ગેરકાયદેસર હેરફેર સામેના આંતરરાષ્ટ્રીય દિવસના સંદર્ભમાં વિવિધ કાર્યક્રમોનું આયોજન કરવામાં આવેલ છે. જે અંતર્ગત સામુદાયિક આરોગ્ય કેન્દ્ર, ઘોઘલા ખાતેથી દીવ જિલ્લા સમાહર્તા શ્રીમતી ભાનુ પ્રભા અને પોલીસ અધિક્ષક શ્રી પીયુષ ફુલઝેલેના વરદ હસ્તે નશીલા પદાર્થોનો દુરુપયોગ અને ગેરકાયદેસર હેરફેર સામેના આંતરરાષ્ટ્રીય દિવસના ઉપલક્ષમાં ટેબ્લુને લીલીઝંડી આપી પ્રસ્થાન કરાવવામાં આવ્યું હતું. જેમાં આરોગ્ય અધિકારી શ્રી કાસીમ સુલતાન પણ ઉપસ્થિતિ રહ્યા હતા. આ ટેબ્લુ ત્રણ દિવસ સુધી દીવ જિલ્લાના શહેરી અને ગ્રામ્ય વિસ્તારોમાં આવેલ જાહેર સ્થળો અને શાળાઓ ખાતે ફરશે અને અને ટેબ્લુમાં લગાવેલ બેનર, સ્ટીકર અને અમદાવાદની મિતેશ પાંડવ ક્રીએશનની ટીમ દ્રારા વિવિધ સ્થળો પર શેરી નાટકના માધ્યમથી લોકોમાં વિવિધ પ્રકારના નશાકારક પદાર્થોના દુરુપયોગથી માનવ શરીર પર થતી ખરાબ અસર અને નુકશાન અંગે લોકોમાં તેમજ સમાજમાં જાગૃતતા ફેલાવશે અને ભારત સરકારના નશા મુક્ત ભારત અભિયાન હેઠળ નશા મુક્ત ભારતના સપનાને સાકાર કરવાના સંદેશને લોકો સુધી પહોંચાડશે.
રિપોર્ટર : વિજયલક્ષ્મી પંડ્યા, દીવ
Advt.
